Dé·jà-vu-ja e talljes me Diasporën!!!

Nga Bledar S. Maliqi.

Para 8 vitesh Partia Socialiste e Shqipërisë dhe Erion Veliaj erdhën në pushtet me premtimet ndaj Diasporës se gjatë mandatit të tyre të parë do të:

• transformonin shërbimin konsullor në një shërbim modern, larg korrupsionit, nepotizmit dhe favoreve partiake
• bënin realitet votën e Diasporës me anë të votimit me postë
• unifikonin transferimin e pensioneve dhe sigurimeve shoqërore dhe arrinin marrëveshje bilaterale veçanërisht me shtetet si Greqia dhe Italia.
• rrisnin buxhetin e arsimit dhe akordonin një përqindje të caktuar për krijimin e shkollave shqipe dhe qëndrave kulturore jashtë vendit.

Partia në pushtet akuzonte per kapjen nepotike të selive tona diplomatike, ndërkohë që sot emëron militantë dhe titullarë partiakë si oficerë koordinues diaspore, madje të atillë, të cilët janë të përjashtuar më parë nga shërbimi diplomatik për arsye korruptive dhe nepotizmi. Sot, pas tetë vitesh në pushtet, asnjë nga këto premtime nuk rezulton të jetë e realizuar.

Arsyetimet burokratike dhe politike nuk pinë më ujë!

Premtimet në deklaratën e Erion Veliaj 8 vite më parë, tingëllojnë sot një tallje therëse ndaj Diasporës por dhe atij elektorati që i votoi.

Zgjedhjet në Kosovë/ Fushata e përqëndruar te sigurimi i vaksinës anti-Covid, çfarë po premtojnë partitë

Na ndajnë rreth një javë nga zgjedhjet në Kosovë dhe një nga premtimet kryesore të partive që garojnë në zgjedhjet e 14 shkurtit është sigurimi i vaksinës anti-Covid.

LDK-ja që aktualisht ka drejtimin e vendit dhe që synon edhe një mandat tjetër ka premtuar sigurimin e 1 milionë e 800 mijë vaksinave. Ndërkohë kreu i Vetëvendosjes, Albin Kurti u angazhua për të vaksinuar 60 për qind të popullsisë në Kosovë.

Në të njëjtën linjë edhe PDK-ja ka premtuar se do të vaksinojë gjysmën e popullsisë përgjatë vitit 2021, ndërsa në 2022-in do të vazhdojë me pjesën tjetër. Kështu ka bërë me dije kandidati për kryeminstër, Enver Hoxhaj.

Edhe AAK-ja synon të vaksinojë mbi 60 për qind të popullsisë. Këto deklarata janë bërë ditët e fundit nga përfaqësues të partive në garë për zgjedhjet e 14 shkurtit.

Rama: Motivi që më shtyn, dëshira për të lënë gjurmë

---

Kryeministri Edi Rama deklaroi të dielën se motivi i tij kryesor që e shtyn të punojë, është dëshira për të lënë gjurmë në histori.

Në një intervistë nga Saranda, Rama u shpreh:

“Shtysa kryesore e imja për të rezistuar dhe për të mos u dorëzuar: Puna e bërë gjatë kohës që merrem me këtë punë të ketë një impakt mjaftueshëm i fortë për të lënë pas një kujtim të mirë.”

Ai theksoi se ka shumë gjëra që do të kishte bërë ndryshe, por sipas tij, është e rëndësishme që të mos përsërisë gabimet:

“Në do kthehesha nga e para shumë gjëra do bëheshin ndryshe dhe më mirë. Njeriu kur punon është i destinuar të gabojë dhe kur gabon mëson. E rëndësishme është që njeriu […] të mos përsërisë gabimet

Serbia të njohë Kosovën”, Vuçiç reagon pas letrës së Biden

Presidenti i Serbisë, Aleksander Vuçiç, ka reaguar pas letrës së dërguar nga Presidenti i Shteteve të Bashkuara të Amerikës, Joe Biden, ku përveç urimit për ditën e shtetësisë së Serbisë kërkoi edhe arritjen e një marrëveshje me Kosovën, të përqendruar në njohje reciproke. Pas letrës së Biden, Vuçiç thotë se njohja e ndërsjellë nuk qëndron në asnjë akt të ndonjë organizate botërore.

“Njohja e ndërsjellë e Serbisë dhe Kosovës nuk qëndron në asnjë akt të ndonjë organizate botërore”, ka thënë Vuçiç teksa theksoi se e kupton që kjo është një politikë e re amerikane, por që përgjigja e tij nuk do të jetë ndryshe nga takimi në Shtëpinë e Bardhë këtë vjeshtë. “Nuk përshtatet kjo” ka thënë Vuçiç, transmeton Tanjug.

Në takimin e shtatorit të vitit të kaluar në Uashington, presidentit serb iu ofrua të përfshinte te  edhe termin “njohje reciproke”, por Vuçiç e hodhi poshtë dhe ky term u hoq nga marrëveshja e Uashingtonit

Fier/ E reja me probleme mendore plagos me thikë babanë dhe vëllain

Policia arrestoi një 30-vjeçare me probleme të shëndetit mendor në Drenovë të Mallakastrës pasi plagosi me thikë babanë dhe vëllain e saj.

“Në datë 06.02.2021, rreth orës 22:00, në fshatin Drenovë, Mallakastër, në banesë, shtetasja E. H (e cila vuan nga probleme të shëndetit mendor), për motive të dobëta ka goditur me një mjet prerës (thikë), babain e saj, shtetasin F. H., 60 vjeç dhe vëllain, shtetasin N. H., 27 vjeç, të cilët ndodhen në spitalin Rajonal Fier, nën kujdesin e mjekëve jashtë rrezikut për jetën.

---

Materialet do i kalojnë Prokurorisë pranë Gjykatës së Shkallës së Parë Fier për veprën penale “Dhunë në familje”.” – njoftoi policia

Një tjetër mjek humb jetën nga koronavirusi, i shtruar prej dy javësh në spital

Një lajm i trishtë ka ardhur mbrëmjen e djeshme për banorët e qytetit të Beratit. Mjeku endokrinolog, Josif Dena, humbi jetën si pasojë e Covid-19. Ai ishte i shtruar në Spitalin “Shefqet Ndroqi” prej dy javësh, ndërsa ditët e fundit ishte intubuar. Shkak për intubimin u bë një përkeqësim i gjendjes së tij shëndetësore.

Dena ka punuar si endokrinolog në Spitalin Rajonal të Beratit, deri në daljen në pension disa muaj më parë. Mjeku që nuk e mposhti dot betejën me virusin vdekjeprurës u përcoll mesditën e sotme për në banesën e fundit në varrezat e Burdulliasit në qytetin e Beratit.

Irani vë kushte për kthim në marrëveshjen bërthamore

Irani po vë kushte për zbatimin e marrëveshjes bërthamore me fuqitë perëndimore. Lideri Suprem i Iranit, Ajatollah Ali Khamenei ka thënë se Shtetet e Bashkuara duhet të heqin të gjitha sanksionet, nëse duan që Irani të kthehet në marrëveshjen bërthamore. Njoftimi është bërë nga televizioni shtetëror iranian.

“Pasi të shohim se sanksionet janë hequr, atëherë ne do t’i kthehemi zotimeve tona“, ka thënë Khamenei. Më herët ministri i Jashtëm i Iranit i kërkoi Uashingtonit të veprojë shpejt për t’u kthyer në marrëveshjen bërthamore të vitit 2015.

---

Ai ka thënë se “koha po kalon për amerikanët”, duke e ndërlidhur me zgjedhjet që pritet të mbahen në qershor në Iran. Parlamenti Iranian miratoi një legjislacion në dhjetor i cili e detyron qeverinë të fuqizojë programin bërthamor, nëse SHBA-ja nuk i lehtëson sanksionet deri më 21 shkurt.

“Ne nuk kemi nevojë të kthehemi në tryezën e negociatave. Amerika është ajo që duhet të gjejë rrugën për të ardhur në tryezë“, ka thënë kryediplomati iranian. Ish-presidenti amerikan, Donald Trump, tërhoqi Shtetet e Bashkuara nga marrëveshja bërthamore më 2018 dhe filloi rivendosjen e sanksioneve kundër Iranit.

Trump pati thënë se marrëveshja ishte e negociuar keq dhe se ajo i mundësonte Iranit të zhvillojë armë bërthamore. Si përgjigje, Teherani gradualisht ka shkelur pjesë të paktit. Muajin e kaluar, Teherani rifilloi pasurimin e uraniumit në 20 për qind – një nivel që kishte arritur para marrëveshjes.

Administrata e presidentit, Joe Biden, po shqyrton mënyrat për t’u kthyer në marrëveshje. Biden ka thënë se nëse Teherani kthehet në përputhje të plotë me paktin, Uashingtoni do ta pasonte, por Teherani ka thënë se së pari Uashingtoni duhet të lehtësojë sanksionet./REL

Mbi 40 milionë amerikanë kanë marrë vaksinën anti-covid

Më shumë se 39 amerikanëve u është injektuar  me vaksinën anti-Covid. Qendra amerikane për Kontrollin dhe Parandalimin e Sëmundjeve bëri me dije se janë shpërndarë 59,304,600 doza të vaksinave anti-covid në SHBA dhe se prej tyre 39,037,964 doza ishin marrë. Sipas agjencisë 30,250,964 njerëz kishin marrë një ose më shumë doza, ndërsa 8,317,180 njerëz kishin marrë dozën e dytë që nga dita e shtunë, shkruajnë mediat e huaja.
SHBA-ja vijon të mbetet shteti më i prekur në botë nga virusi, me një numër rekord të infektuarish e viktimash.

U dhunua nga shokët për çështje politike, ndërron jetë 57-vjeçari

Ka ndërruar jetë në spitalin e traumës në Tiranë, 57-vjeçari Pelivan Sinanrrapaj, i cili u dhunua nga tre shokët e tij disa ditë më parë. Mbrëmjen e 29 janarit 57-vjeçari Sinanrrapaj së bashku me tre shokët e tij Fitim Zekaj 42 vjeç, Festim Alimetaj 53 vjeç dhe Ferdinand  Meraj 44 vjeç, pasi kishin konsumuar alkool në një lokal në Ballsh, u nisën të debatonin duke përfunduar sherrin me plagosjen rëndë të njërit prej tyre. Shkak i sherrit në lokal midis tyre ishte një debat për çështje politike.

Që atë natë, Sinanrrapaj u dërgua në spitalin e Ballshit, dhe më pas u nis për në Tiranë në spitalin e Traumës për shkak të gjendjes së rënduar shëndetësore. Edhe pse prej ditësh trajtim dhe kontroll të vazhdueshëm në spital 57-vjeçari, nuk ka mundur t’iu mbijetojë plagëve të marra.